Valdimar H Jóhannesson

10.11.2018 | 09:12

Heimsendabull verðlaunað

Ég sá kvikmyndina Kona fer í stríð tvisvar og var stórhrifinn vegna listilegrar gerðar hennar. Mér kom því ekki á óvart að hún fengi verðlaun Norðurlandaráðs, m.a. vegna framúrskarandi kvikmyndatöku, leiks, handrits, leikstjórnar og vandaðrar tækni. Ég tók myndina sem lýsingu á náttúrufasískum öfgum samtímans. Verið væri að gera góðlátlegt grín að fólki sem hefði ánetjast æðinu. Stríðskonan var bráðfyndin þar sem hún æddi um í heilögu stríði gegn einhverju sem hún skildi mest lítið í, hafandi orðið fórnarlamb ofstækisfullrar umræðu sem hefur snúist um haldlítil rök og ódýran hræðsluáróður heimsendaspámanna. Mér fannst myndin vera gott háð um umhverfisæðibunuganginn.

Mér kom því ónotalega á óvart að skapendur myndarinnar sjálfir eru í heilögu stríði og fá líklega þessi verðlaun fyrst og fremst vegna þess en ekki vegna þess að þeir eru að bregða upp mynd af ýktum umræðum nú um stundir bíógestum til skemmtunar og íhugunar. Eigum við virkilega að dást að þessari snargölnu konu í krampakenndri sjálfsupphafningu, sem ræðst gegn því samfélagi sem fóstrar hana?

Ávarpsorð Benedikts Erlingssonar leikstjóra við verðlaunaafhendinguna tóku af allan vafa um að aðstandendur myndarinnar eru einstefnumenn, sem eru fyrst og fremst að framleiða áróðursmynd sem ætti að jafna við aðrar hættulegar myndir af sömu sort. Kvikmynd Leni Riefenstahl, Triumph des Willens, sem var áróðursmynd nasista, framleidd 1935, kemur fyrst í hugann. Kannski verða Benedikt og félagar upp með sér að ég líki mynd þeirra við eina frægustu áróðursmynd allra tíma en þetta er ekki hugsað sem hrós hjá mér. Satt að segja féll myndin algjörlega í áliti hjá mér þegar ég gerði mér grein fyrir því hvað hún er fávís og margþvæld tugga meðalmennskunnar.

Myndin ýtti þó við mér, - en með öðrum hætti en áróðursmennirnir ætla, - ekki síst þegar ég hélt áfram að heyra bullandi grunnhyggni í laugardagsþætti Gísla Marteins. Allir viðmælendur hans tóku undir búralegt yfirlæti Benedikts sem sat þar í upphöfnum véfréttarstíl, - handhafi stóra sannleikans. Fullyrðingar um að núna séu síðustu forvöð að bjarga heiminum vegna ofhitnunar og hamfara henni samfara eru að mínu mati glórulaust bull eftir að hafa heyrt í fjöldanum öllum af merkustu vísindamönnum heims um þetta efni. Þeir harðneita því að nokkur vandi stafi af koltvísýringi ættuðum úr mannheimi né koltvísýringi almennt, enda helsta byggingarefni lífsins og í minna magni í andrúmslofti nú en oft áður í sögu jarðar.

Sumir kynnu að ætla að svona orðræða sé meinlaus. Telji þægilegast að fylgja fjöldasefasýki heimsins því að óneitanlega blása vindarnir helst í þessa átt núna. Benedikt gerir því eins og Riefenstahl sem flaut með straumnum og naut góðs af. Eins og mynd Riefenstahl leiddi til aukinna hörmunga mun áróður umhverfisofstækisins leiða illt af sér nema ljósgeisli almennrar skynsemi geti brotið sér leið í gegnum myrkrið og þöggunina sem andstæð sjónarmið hafa mátt þola.

Svona grunnhygginn áróður mun kosta íslenska skattgreiðendur mikið og fækka tækifærum til þess að taka á aðkallandi verkefnum vegna aukins kostnaðar af dýrum lausnum þar sem ódýrari lausnir blasa við. Hann mun skila þjóðinni lakari lífskjörum og verra mannlífi. Nær væri að snúa af þeirri braut sem stjórnmálamenn hafa kallað yfir okkur með Parísarsamkomulaginu alræmda og fyrirsjáanlegra tröllaukinna umhverfissekta sem þjóna engum markmiðum nema að drekra við sjálfbirgingana, sem hafa leitt þetta yfir okkur.

Svo ekki sé talað um sprenghlægilegu ímyndarsölumennskuna með kolefniskvótum. Þetta og ætlun stjórnvalda að fylla upp í mýrarskurðina út um allt land sem kostuðu tugi milljarða króna af almannafé er svo fráleitt að Orwell og Huxley hefðu aldrei sett það í bækur sínar þó að þeim hefði dottið slík geggjun í hug. Þeir vissu að enginn hefði getað trúað svo ýktri mynd af framtíðinni!

Með því að hafna bestu orkugjöfum hvers tíma er verið að dæma Íslendinga til minni velmegunar og leiða yfir vanþróuðu löndin hörmungar sem einnig munu hitta okkur fyrir. Þróunarlöndin munu aldrei komust upp úr fátæktinni nema þeim standi til boða hagkvæm orka. Umhverfisofstækið er að dæma þessi lönd til áframhaldandi fátæktar. Ódýra orkan og vélaraflið dró okkur upp úr volæðinu á síðustu öld og er ein helsta forsenda velmegunar okkar.

Mynd Riefenstahl hóf nasismann til skýjanna og ruddi þar með meiri hörmungum braut en ella hefði orðið. Gjörð aðstandenda myndarinnar Kona fer í stríð er ekkert betri, - kannski verri. Erfiðara var að fara á móti straumnum í Þýskalandi nasismans en á móti sefasýkinni núna. >> Fullyrðingar um að núna séu síðustu forvöð að bjarga heiminum vegna ofhitnunar og hamfara henni samfara eru að mínu mati glórulaust bull.

Þessi grein birtist í Mbl í dag 10.11.2018

Meginflokkur: Bloggar | Aukaflokkar: Stjórnmál og samfélag, Umhverfismál, Utanríkismál/alþjóðamál | Breytt s.d. kl. 09:28 | Facebook

Athugasemdir

Nákvæmlega svona sá ég þessa mynd. Þakka þér fyrir frábæra grein.....

Jóhann Elíasson, 10.11.2018 kl. 17:47

Frábær ertu, Valdimar.

Jón Valur Jensson, 11.11.2018 kl. 03:36

Hvað segir þú sérfæðingur mannapana að 60% allra villtra dýra skuli vera útrýmd síðan 1970? Það er nákvæmlega vegna svona manna eins og þín að við erum að deyja út!

Sigurður Haraldsson (IP-tala skráð) 11.11.2018 kl. 09:28

Sigurður

Ég ætla að gera undantekningu í þetta skiptið og hleypa athugasemd þinni að þrátt fyrir ruddalegan málflutning þinn sem er þér til skammar. Við getum verið ósammála án þess að vera með kjánalegar nafngiftir.

Ég þykist ekki vera kunnugur í flóknum vísindum loftlagsmála þó að ég hafi rétt kíkt inn í heim efnafræðinnar í Háskóla Íslands á síðustu öld en ég þykist vera sæmilega læs og fær um að skilja einhverjar erlendar tungur og þar á meðal ensku.

Ég mótmæli ekki ýmsum umhverfisvanda en þar er mengun af ýmsu tagi meðtalin. Það sem ég er einfaldlega að segja með greininni er að koltvísýringur í andrúmslofti er ekki sá vandi sem ýmsir offarar í umhverfismálum hafa haldið fram og byggi þá skoðun mína á málflutningi þeirra sem ég treysti.

Hér fyrir neðan eru strengir á málflutning nokkurra raunverulegra vísindamanna af fjöldamörgum sem hafa tjáð sig gegn því að um sé að ræða hnattræna hlýnun af mannavöldum.

Þú hefðir gott af því að hlusta fyrst á þá áður en þú þykist vera þess umkominn að setja ofan í við mig fyrir minn málflutning.

Ég skal svara þér um hvaðeina svo lengi sem þú sýnir eðlilega háttvísi.

Confessions of a Greenpeace Dropout - Dr Patrick Moore

https://www.youtube.com/watch?v=dCrkqLaYjnc

Nobel Laureate in Physics; "Global Warming is Pseudoscience

https://www.youtube.com/watch?v=SXxHfb66ZgM

Global Warming; 31,487 Scientists say NO to Alarm

https://www.youtube.com/watch?v=eiPIvH49X-E

Climatology is a "Joke" - Nobel Laureate Dr Kary Mullis

https://www.youtube.com/watch?v=Y1FnWFlDvxE

Professor Bob Carter - The Faux "97% Consensus" - 10th ICCC

https://www.youtube.com/watch?v=5NinRn5faU4