Löglausar kröfur ber að greiða- eða hvað?

Lárus Blöndal hrl. og fleiri hafa ítrekað haldið því fram að Bretar og Hollendingar eigi ekki neinar löglegar kröfur á hendur íslenska ríkinu vegna Icesave reikninganna.  Landsfundur Sjálfstæðisflokksins tók undir þetta og sagði við greiðum ekki löglausar kröfur Breta og Hollendinga.

Þeir menn sem þannig tala og hugsa hljóta að vera á móti því að við greiðum löglausar kröfur Breta og Hollendinga á hendur okkur og greiða atkvæði gegn öllum samningum um Icesave. 

Hver á fætur öðrum jafnt ráðherrar sem óbreyttir þingmenn ruddust fram í atkvæðagreiðslunni um Icesave með sínar atkvæðaskýringa  og sögðu að Bretar og Hollendingar ættu engar lögvarðar kröfur á hendur okkur. Samt sem áður samþykktu þeir samninginn sem nú verður borinn undir þjóðina. 

Ég gat ekki varist þeirri hugsun að ég væri að horfa á hóp fólks sem væru geðklofar þegar ég fylgdist með umræðum og atvkæðagreiðslu frá Alþingi um Icesave. Dr. Jekyll og Mr. Hyde birtust þarna fram og til baka. Sögðu okkur ber ekki skylda til að greiða og "þess vegna greiði ég atkvæði með því að við greiðum löglausar kröfur Breta og Hollendinga".  

Það er óskiljanlegt að þeir sem telja kröfur Breta og Hollendinga löglausar skuli geta látið sér detta það í hug að leggja tugamilljarða byrðar á herðar þjóðarinnar vegna slíkra krafna. Hvers konar fólk er þetta eiginlega sem nálgast vandamál með þessum hætti?

Og þetta eru ekki íslenskar krónur heldur gjaldeyrir. Fyrir utan síðustu tvö ár hefur verið viðvarandi og verulegur halli á gjaldeyrisviðskiptum þjóðarinnar í áratugi. Við höfum lifað um efni fram í áratugi og getum það ekki lengur en auk þess þurfum við kannski herða sultarólina um nokkur göt vegna óútfyllts tjékka sem enginn veit hver verður en engin lög standa til að við borgum. Vonandi hefur þjóðin sjálf vit fyrir þessum geðklofa mönnum.

Athugasemdir

[Eyjólfur G Svavarsson, 3.3.2011 kl. 13:50]

Ég er sammála þér, Valdimar. Maður skilur ekki sonalagað. Maður veit ekki hvaðan á mann stendur veðrið. Alþingi er orðið eins og snúnings skífa sem beðið er með eftirvæntingu á hvað örin bendir. Hvernig er hægt að taka mark á svona þingi? Það er eins og maður hangi í lausu lofti maður veit ekki hvað kemur næst!

[Elle_, 3.3.2011 kl. 22:41]

Ég gat ekki varist þeirri hugsun að ég væri að horfa á hóp fólks sem væru geðklofar þegar ég fylgdist með umræðum og atvkæðagreiðslu frá Alþingi um Icesave.

Já, hvað getur maður haldið?  Geðbilun, rolur heimsins, Stockholms Syndrome??   Hver veit?  Og ICESAVE kúgunarsamningurinn gefur upp lögsögu okkar yfir til Breta, eins ótrúlegt og það hljómar. 

Með lögunum og öllum rökum með okkur hefur enga þýðingu einu sinni að segja það við þetta óskiljanlega vegvillta fólk og maður getur lamið höfðinu utan í veggi.  Ætli finnist önnur stjórn í hinum vestræna heimi sem leggst svo lágt??

[Hrannar Baldursson, 4.3.2011 kl. 06:02]

Þú gleymir að ekki er verið að tala um tugi milljarða, heldur hundruði milljarða. Einhvern veginn hefur áróðursmaskínunni tekist að blása yfir þessa 1200 milljarða sem óvissan og áhættan á við um.

[Valdimar H Jóhannesson, 4.3.2011 kl. 12:48]

Þakka ykkur fyrir athugasemdirnar 

Ég er sammála því að það eru margir fletir á þessu máli aðrir en ég tók fyrir eins og til dæmis framsal á lögsögu okkur yfir málinu og óvissan um hver endanleg upphæð kynni að vera.

Vonandi reynust við vera nógu mörg til að hafna þessum fráleitu samningum. Rökin sem nú er verið að halda á lofti að þetta verði svo kannski engin fjárhæð að lokum vegna þess hve mikið fæst inn í þrotabúið eru auðvitað einnig rök fyrir því að ekki eigi að semja enda hafi þá Bretar og Hollendingar enga hagsmuni í málinu.

Eins og nú horfir í efnahagsmálum heimsins með feiknalegum hækkunum olíuverðs er því miður ekki ástæða til bjartsýni með sölu á eignum þrotabúsins í ljósi hugsanlegrar kreppu í uppsiglingu. Ef Það er rétt að aflandsgengi íslenskur krónunnar sé 250-270 krónur á hverja evru er það einnig vísbending um hvert gengið gæti verið að leita þegar það væri tekið úr gjörgæslu. Við gætum verið að tala um margfalda þá upphæð sem samninganefndin er að hampa.

Svo eru rökin einnig þau að við eigum að semja vegna þess að við gætum hugsanlega tapað máli vegna skaðabótakrafna Breta og Hollendinga þó að líkindin séu nánast engin. Hins vegar eigum við ekki að hafa neinar áhyggjur af því að neyðarlögin gætu verið dæmd ógild. Neyðarlögin breyttu eftirá forgangsröðun á kröfum í þrotabú bankanna og eru miklu hæpnari frá lögfræðilegu og siðrænum viðmiðum en lagalegur og siðrænn grunnur er undir þá afstöðu að Icesave komi skattgreiðendum ekkert við eins og við sem ætlum að fella samningin um ríkisábyrgð á kröfur Breta og Hollendinga á ábyrðgarsjóð föllnu bankanna höldum fram. Ef neyðarlögin falla fara Icesave-kröfurnar á þjóðina alveg upp úr þakinu og upp rynni efnahagsleg ísöld á Íslandi um ókomna framtíð. Við eigum sem sagt að binda okkur á þessa drápsklafa áður en úr því fæst skorið hvort neyðarlögin halda og að Icesave innistæðurnar hafi forgang yfir aðrar kröfur. 

Auðvitað er hægt að fallast á það að yfirgnæfandi líkindi eru til þess að neyðarlögin haldi fyrir íslenskum dómsstólum eins og það eru yfirgnæfandi líkindi fyrir því að skaðabótakröfur Breta og Hollendinga fengju ekki hljómgrunn hjá íslenskum dómsstóli. Ég myndi heldur vilja vera dómari í seinna málinu en í því fyrra.